آلصمت له عندي معزّه ومقدار ..
في زحمة الأفواه .. يا مزين الصمت ..!!
لا صار بعض البوح عند البشر عار ..
لو يشتعل "جوفي" حشى ما تكلّمت
تعبت من قولة : (علامك) و (وش صار )
وان طحت ما ألقى سوى كلمة (سلمت)
وأعذار اخلقها ولو مالي اعذار
مشّيتها مره .. ومرات ما رمت ..!!
كذبة صباح الخير/ يا صبح الأنوار
عذري ليا عدّت ليالي ولا نمت
اسهر طوال الليل وضْيوفي افكار
وأقول لاْصحابي : نعم توّني قمت ..!!
ما عاد فيني ألفت عْيون واْنظار
يكفي بأني من زماني تعلّمت
إن الصدر بيت(ن) .. وسكّانه اسرار
نيّام بس يصحون لامن تألّمت
يصحون ويناظرهم الجار والمار
وش عاد ينفع سترهم لو تكتّمت ..!!
آقدّم اقدامي على درب الاصرار
امشي ولكن للأسف ما تقدّمت
(النار قدامي .. ومن خلفي النار ..!!)
والعمر يمضي بي وأنا ما تولّمت
يا لين ذاك الحلم في لحظه انهار
وأنا مع لحظة سقوطه تحطّمت
اجروحي اكثار .. وتناهيدي اكثار
لكن على كثر المواجع "تبسّمت"
ثم أْلتزمت الصمت وعزومي اكبار
ولو يشتعل جوفي حشى ما تكلّمت
الجمعة أبريل 09, 2010 2:46 pm
